HAMAS G‘azodagi qochqinlar lageriga hujum uchun javobgarlikni AQSH zimmasiga yukladi

Falastinning HAMAS harakati G‘azo sektoridagi qochqinlar markaziga qilingan hujumda AQSH ma’muriyati va prezident Jo Baydenni aybladi.

“Yuzlab ko‘chirilganlar boshpana topgan Usama bin Zayd BMT maktabidagi dahshatli qirg‘in.

Biz AQSH maʼmuriyati va prezident Baydenni (G‘azo sektoridagi) qator qirg‘inlar uchun to‘liq javobgar deb hisoblaymiz. Agar Qo‘shma Shtatlar bosqinchilarga (Isroil nazarda tutilmoqda) qirg‘in urushini davom ettirish uchun yashil chiroq yoqmaganida, bu sodir bo‘lmasdi”, — deya HAMAS vakilining bayonotidan iqtibos keltiriladi.

Avvalroq Falastinning WAFA axborot agentligi Isroil armiyasi hozirda minglab qochqinlar boshpana qilgan maktabga zarba bergani, oqibatda o‘nlab odamlar halok bo‘lgani haqida xabar bergandi. Keyinchalik OAV qochqinlar lageriga berilgan zarba oqibatlari aks etgan videoni e’lon qildi.

3-noyabr kuni Isroil bosh vaziri Binyamin Netanyaxu garovga olinganlarni ozod qilmasdan o‘t ochishni to‘xtatish imkoniyatini rad etdi.