Ukraina Rossiya tomonidan uchirilgan beshta dron va bitta raketani urib tushirdi
Rossiya qo‘shinlari 10-noyabr kechasi Ukraina hududiga oltita Shahed-136/131 kamikadezde dronlarini, shuningdek, X-31 va X-59 boshqariluvchan aviatsiya raketalari bilan hujum uyushtirdi. Bu haqda Ukraina Qurolli kuchlari Havo kuchlari qo‘mondonligi ma’lum qildi.
Ukrainalik harbiylarning ma’lumotlariga ko‘ra, uchuvchisiz boshqariladigan uchish qurilmalari Krasnodar o‘lkasi, raketalar esa Xerson viloyatining egallab olingan hududidan uchirilgan.
Beshta dron va X-59 raketasi Dnepropetrovsk, Xarkov, Nikolayev, Poltava va Kiyev viloyatlarida urib tushirilgani aytilmoqda.
Kechasi uyushtirilgan hujum sabab Ukrainaning qator viloyatlarida havo trevogasi e’lon qilingan. Kiyev viloyatida havo hujumidan mudofaa tizimlari ishga tushgan. Viloyat harbiy ma’muriyati boshlig‘i Ruslan Kravchenkoning ma’lum qilishicha, Kiyev viloyatidagi havo makonida dronlar aniqlangan bo‘lib, ularning barchasi urib tushirilgan.
Bundan tashqari, Ukraina IIV Cherkasi viloyatida ham bitta dron urib tushirilganini ma’lum qildi. Fuqarolarga jarohat yetmagan.
Avvalroq Ukraina Oliy radasi prezident Vladimir Zelenskiy tomonidan kiritilgan mamlakatdagi harbiy holat va umumiy safarbarlikni yana 90 kunga — 2024-yil 14-fevralgacha uzaytirish to‘g‘risidagi qonun loyihalarini qabul qilgandi.
