Rossiyadagi porox zavodlarining birida yong‘in sodir bo‘ldi (video)
11-noyabrga o‘tar kechasi Tambov viloyati Kotovsk shahridagi porox zavodida yong‘in sodir bo‘ldi. Bu haqda Telegram’dagi Baza kanali xabar berdi.
Keyinroq yong‘in yuzaga kelganini viloyat FVV ham tasdiqladi. Idora ma’lumotlariga ko‘ra, yong‘in porox zavodining alohida joylashgan bir qavatli binosida sodir bo‘lgan va 300 kvadrat metr maydonni egallab olgan. Hodisa joyiga yetib kelgan o‘t o‘chiruvchilar yong‘inni bartaraf etgan. Jarohat olganlar yoki yong‘in nima sababdan yuzaga kelgani to‘g‘risida ma’lumot berilgani yo‘q.
BBC rus xizmatining qayd etishicha, bu mazkur zavodda so‘nggi yarim yil ichida sodir bo‘lgan ikkinchi yong‘in. Iyunda zavodda yuz bergan portlash va yong‘in oqibatida 5 kishi halok bo‘lgandi. Viloyat rahbari Maksim Yegorov o‘shanda yong‘inga inson omili sabab bo‘lganini ma’lum qilgandi.
Rossiya qo‘shinlari 10-noyabr kechasi Ukraina hududiga oltita Shahed-136/131 kamikadze dronlarini, shuningdek, X-31 va X-59 boshqariluvchan aviatsiya raketalari bilan hujum uyushtirgani to‘g‘risida xabar berilgandi.
