Jo Bayden Ukraina va Isroildagi mojarolar dunyoga taraqqiyot olib kelishiga ishonmoqda
AQSH prezidenti Jo Bayden Amerikaning The Washington Post nashri uchun maqola yozdi, unda u Ukraina va Isroildagi harbiy mojarolarning dunyodagi va AQSHdagi vaziyatga ta’sirini muhokama qildi.
Siyosatchining fikricha, hozir sodir bo‘layotgan voqealar kelajakda “dunyo va Amerikaga taraqqiyot olib keladi”.
“Ukraina, Isroil, G‘azo va boshqa ko‘plab joylarda zo‘ravonlik va azob-uqubatlar ko‘p bo‘lgan bir paytda, vaziyat boshqacha bo‘lishi mumkinligini tasavvur qilish qiyin. Ammo biz vaqt va tarix saboqlarini hech qachon unutmasligimiz kerak: katta fojia va zarba tufayli katta taraqqiyot bo‘lishi mumkin”, — dedi Amerika prezidenti.
Uning ta’kidlashicha, AQSH va butun xalqaro hamjamiyat Isroil va Ukrainadagi mojaro zonalarida janglarni muvaffaqiyatli yakunlash uchun barcha sa’y-harakatlarini amalga oshirishi kerak.
Jo Bayden, shuningdek, HAMASning Isroildagi harakatlarini Rossiya prezidenti Vladimir Putinning Ukraina masalasidagi siyosati bilan tenglashtirdi.
“Putin ham, HAMAS ham qo‘shni demokratiyalarni yo‘q qilish uchun kurashmoqda. Putin ham, HAMAS ham kengroq mintaqaviy barqarorlik va integratsiyani buzishga va yuzaga kelgan tartibsizlikdan foydalanishga umid qilmoqda. Amerika bunga yo‘l qo‘ymaydi”, — dedi Bayden.
Mazkur maqolada AQSH prezidenti HAMAS va Isroil o‘rtasidagi urush tugagandan so‘ng, Falastin milliy ma’muriyati G‘azo sektorini nazorat qilishi kerakligi va Falastin xalqining o‘zi to‘la huquqli davlat yaratish huquqiga egaligi haqida fikr bildirdi.
