HAMAS tomonidan garovga olinganlar va o‘ldirilganlarning oilalari Netanyaxuning iste’fosini talab qilmoqda

7-oktyabrdagi HAMAS harakatining Isroilga uyushtirgan hujumida yaqinlarini yo‘qotgan yoki qarindoshlari HAMAS tomonidan garovga olingan bir guruh oilalar juma kuni Knesset (parlament) oldida yig‘ilib, bosh vazir Binyamin Netanyaxuning lavozimidan chetlatilishini talab qilishdi. Bu haqida Jerusalem Post nashri xabar qildi.

Nashr namoyishni uyushtirgan guruh bayonotidan parcha taqdim etdi. Unda aytilishicha, oilalar 16 kundan beri har kuni Knesset oldida yig‘ilishmoqda, chunki ular “hukumat o‘z obro‘sini himoya qilish uchun hammani xavf ostiga qo‘yayotgan paytda” uyda sabr qilib kutib o‘tirishni istashmayapti.

Qayd etilishicha, ertaga 25-noyabr shanba oqshomida bir qator norozilik guruhlari Quddusning Aza ko‘chasida Netanyaxuning iste’fosini talab qilib, namoyish o‘tkazish niyatida.

Avvalroq Isroil muxolifati yetakchisi Yair Lapid bosh vazir Binyamin Netanyaxuni almashtirish vaqti kelganini aytgandi.