Yaman qirg‘oqlari yaqinida qo‘lga olingan Isroil tankeriga Amerika kemasi yordamga keldi
AQSH harbiy-dengiz kuchlarining “Meysn” kemasi Aden ko‘rfazida “qaroqchilar” tomonidan qo‘lga olingan tankerga yordamga keldi, deb xabar bermoqda Reuters AQSH rasmiylari bayonotiga tayanib.
Central Park nomli tanker ozod qilingan, ekipaj a’zolarining hech biri jabrlanmagan, yuklarga ham zarar yetmagan. Bayonotda aytilishicha, besh nafar qaroqchi qayiqda qochishga uringan, biroq ularni qo‘lga olishgan. Hujum ishtirokchilari haqida ma’lumot berilmagan.
Yaman hududidan Amerika kemasi va tanker tomon ikkita ballistik raketa uchirilgan. Ammo AQSH rasmiylari nishonni taxminan 10 dengiz mili (18,5 kilometr) nariga o‘tkazib yuborganini ta’kidladi.
Fosfor kislotasini olib ketayotgan kemaga hujum haqida 26-noyabr kuni tushdan keyin ma’lum bo‘ldi. Qayd etilishicha, tanker isroillik tadbirkor Eyalya Oferning Zodiac Maritime kompaniyasiga tegishli. Kompaniya Zodiac Group tarkibiga kiradi.
Avvalroq Yamanning “Ansor Alloh” guruhi Isroil shirkatlariga qarashli har qanday kemaga hujum qilishini aytgandi. O‘z navbatida Zodiac Group gap Aden ko‘rfazida faol bo‘lgan qaroqchilar haqida ketayotganini istisno qilmadi.
