Isroil mudofaa vaziri sulhdan keyin katta kuch bilan jang qilish rejasi haqida gapirdi
Isroil mudofaa vaziri Yoav Galant Isroil armiyasi sulh tugaganidan keyin G‘azo sektori bo‘ylab katta kuchlar bilan jang qilishini aytdi, deb xabar bermoqda The Times of Israel. Vaqtinchalik sulh 29-noyabrda tugashi kerak.
“Sizda bir necha kun bor, biz jangovar harakatlarga qaytamiz, xuddi avvalgidek, balki undan ham ko‘proq kuch bilan jang qilamiz. Esda tutingki, siz reja qilayotganingizda, dam olayotganingizda va vaziyatni o‘rganayotganingizda, dushman ham xuddi shunday qiladi. Siz har tomonlama tayyor dushman bilan uchrashasiz”, — dedi Galant Givati piyodalar brigadasi va zirhli korpus askarlari bilan uchrashuvda.
Vazirning aytishicha, sulh tugaganidan keyin Isroil armiyasi Falastinning HAMAS harakatini Isroil havo kuchlari bombalari bilan, keyin tank va artilleriya snaryadlari, D9 harbiy buldozerlari va nihoyat piyodalar otishmasi bilan kutib oladi.
22-noyabr kuni Isroil va HAMAS vaqtinchalik o‘t ochishni to‘xtatish va garovga olinganlarni mahbuslarga almashishga kelishib oldi. To‘rtinchi almashinuv bugun, 28-noyabrga o‘tar kechasi bo‘lib o‘tdi. 11 nafar isroillik garovga olingan vatanlariga qaytdi, 33 nafar falastinlik mahbus qamoqdan ozod etildi.
