Suriyada jangovar harakatlarda ishtirok etib kelayotgan andijonlik yigit qidirilmoqda
Suriyadagi jangovar harakatlarda ishtirok etib kelayotgan andijonlik yigit bir yildan buyon qidirilmoqda. Bu haqda Andijon viloyati hokimligi axborot xizmati xabar berdi.
Xabarga ko‘ra, Muxtorov Abdusaid 2001-yilda Andijon viloyati Andijon tumanida tug‘ilgan. U 2020-yil 7-mart kuni Turkiyaning Istanbul shahriga mavsumiy ishlash uchun borgan. O‘sha yerda xalqaro terroristik tashkilot rahnamolarining ta’siriga tushgan va yashirin jamoatlarda ishtirok etgan.
Fuqaro Istanbuldan Suriyaning Idlib shahridagi “Imom Buxoriy katibasi” xalqaro terroristik tashkiloti tarkibiga qo‘shilib, jangovar tayyorgarlikdan o‘tgan. Hozirda jangovar harakatlarda ishtirok etib kelmoqda. Huquq-tartibot idoralari tomonidan olib borilgan surishtiruv, tezkor qidiruv tadbirlari natijasida unga nisbatan 2022-yildan Jinoyat kodeksining 244-moddasi 3-qismi hamda 1-qismi bilan jinoyat ishi qo‘zg‘atilib, qidiruv e’lon qilingan.
