Braziliya prezidenti “kelsa-kelmasa” Putinni G20 ga taklif qilishga va’da berdi
Braziliya prezidenti Lula da Silva rossiyalik hamkasbi Vladimir Putinni 2024-yilgi G20 sammitiga taklif qilishini aytdi. Shu bilan birga, Braziliya Putinni hibsga olishga order bergan Xalqaro jinoiy sudning (XJS) Rim statutini ratifikatsiya qilgan davlatlardan biri sanaladi.
“Putin keladimi yo‘qmi, u taklif qilinadi. Unga qarshi protsess ketmoqda, oqibatlarini uning o‘zi baholashi kerak”, — dedi Lula da Silva Correio Brasiliense gazetasiga. “Bu sud qarori. Respublika prezidenti bu qarorlarni muhokama qilmaydi: ularni bajaradi yoki bajarmaydi. Putin Braziliyadagi G20 va BRIKS sammitlariga taklif qilinadi. Va agar u ishtirok etsa, nima bo‘lish-bo‘lmasligini biladi”.
XJS 17-mart kuni Vladimir Putinni hibsga olishga order bergan. Sudga ko‘ra, Rossiya prezidenti Ukrainadan “bolalarni noqonuniy ravishda deportatsiya qilish bilan bog‘liq harbiy jinoyatlar” uchun javobgar hisoblanadi. Rim statutiga a’zo davlatlar orderni bajarishi shart.
Avgust oyida BRIKS sammiti Janubiy Afrika Respublikasida bo‘lib o‘tdi (u ham Rim statutining a’zosi). Vladimir Putin tadbirda videoaloqa orqali ishtirok etdi. Bu qaror Rossiya va JAR o‘rtasida “o‘zaro kelishuv” asosida qabul qilingan.
