AQSH ittifoqchilarga yordami tufayli o‘ziga qurol yetmay qolishi mumkin — Bloomberg
AQSH harbiy-sanoat majmuasining imkoniyatlari mamlakat ehtiyojlarini qondirish uchun yetmay qolishi mumkin, chunki Vashington o‘zining xorijiy ittifoqchilarini faol ravishda qurol-yarog‘ bilan ta’minlamoqda. Bu haqda Bloomberg agentligi xabar qildi.
“Qo‘shma Shtatlar butun dunyo bo‘ylab o‘z ittifoqchilariga qurol-yarog‘ sotmoqda, qarzga bermoda, sovg‘a qilmoqda, bu orqali o‘zidagi o‘q-dorilar, artilleriya snaryadlari va urush holatida kerak bo‘lishi mumkin bo‘lgan boshqa qurollarni kamaytiryapti”, — deyiladi nashrda.
Bloomberg agentligiga ko‘ra, AQSH harbiy-sanoat majmuasi mamlakat ehtiyojlari uchun zarur bo‘lgan o‘q-dorilarni ishlab chiqara olmasligi mumkin.
“Pentagon barcha kutilmagan vaziyatlarni hisobga olishi va ularga tayyor bo‘lishi kerak. Dushmanlar AQSHda sodir bo‘layotgan voqealarni kuzatmoqda va ular AQSHning mudofaasidagi zaif tomonlari yoki qurollarning yetishmasligidan foydalanishi mumkin degan xavotir bor”, — deydi agentlik eksperti Kortni Makbrayd.
Agentlikning ta’kidlashicha, AQShda artilleriya snaryadlarini tayyorlash uchun zarur bo‘lgan porox ishlab chiqaradigan faqat bitta zavod o‘z faoliyatini davom ettirmoqda. Bu fakt mamlakatning “o‘z ishlab chiqarish bazasini yirik davlatlar o‘rtasidagi qarama-qarshilik davri voqeligiga moslashtira olmasligiga” misol bo‘la oladi, deya xulosa qiladi Bloomberg.
