Peskov: “Ukrainaliklar AQSHning ulardan boshqa ham tashvishi ko‘pligini tushunishi kerak”
Rossiya prezidenti matbuot kotibi Dmitriy Peskovning fikricha, Ukrainaga yordam berish Qo‘shma Shtatlarning “asosiy tashvishi” emas. Uning aytishicha, amerikaliklar birinchi navbatda o‘zlari haqida qayg‘uradilar.
“Amerikaliklar juda pragmatik odamlar va, tabiiyki, ularning asosiy maqsadi o‘z farovonligidir. Ukrainaliklar, aslida, AQSH uchun asosiy tashvish emasliklarini tushunishlari kerak. Amerika Qo‘shma Shtatlari uchun asosiy tashvish har doim amerikaliklarning o‘zi bo‘lib kelgan, hattoki o‘sha ko‘p sonli ukrainaliklarning hayoti evaziga bo‘lsa ham”, — dedi Peskov.
Ukraina va Isroilga yordam uchun mablag‘ ajratish AQSHning 17-noyabrda tasdiqlangan vaqtinchalik budjetidan alohida ko‘rib chiqilmoqda. Oq uy ushbu maqsadlar uchun 106 milliard dollar ajratishni taklif qildi, shundan 61 milliard dollardan ortig‘i Kiyevga beriladi.
Ammo Respublikachilar partiyasi vakillari Ukraina va Isroilga yordam berish qaroriga qo‘shilmadi, oqibatda bu masala hozircha ochiq qolmoqda.
