Zelenskiy Rossiyaga hududlarni berishni taklif qilganlarga javob qaytardi

Ukraina prezidenti Vladimir Zelenskiy Rossiya tomonidan bosib olingan hududlar va u yerdagi odamlardan voz kechishni taklif qilayotganlarga murojaat qildi. Bu haqda u AQSH prezidenti Jo Bayden bilan qo‘shma matbuot anjumanida ma’lum qildi, deya xabar berdi UNIAN.

“Gap nafaqat so‘zlarimiz yoki fikrlarimizda, balki biz nimaga tayyor va tayyor emasligimizdadir. Qanday qilib Ukraina oddiygina o‘z hududlaridan voz kechishi mumkin? Ya’ni, bu mutlaqo jinnilik. U yerda bizning odamlar yashaydi, bizning oilalarimiz yashaydi, bolalar ham bor”, — deya taʼkidladi Zelenskiy.

Siyosatchi ularning barchasi Ukraina jamiyatining bir qismi ekanligini qayd etdi.

“Biz tirik odamlar haqida gapiryapmiz. Ularni tahqirlashmoqda. Ular zo‘rlangan, o‘ldirilgan. Biz buni juda yaxshi bilamiz. Gap faqat hududga aloqador emas. Gap tirik odamlarda, ularning taqdirlarida, hikoyalarida. Bolalarni bering, deydigan ovozlarga savolim bor: ular o‘z farzandlarini terrorchilar qo‘liga berishga tayyormi? Menimcha, yo‘q”, — deydi Zelenskiy.