Andijon hokimining suvchilarga tarqatgan mukofot puli homiylik mablag‘lari ekani ma’lum bo‘ldi
Andijon viloyati hokimi Shuhrat Abdurahmonovning suvchilarga 4 million so‘mdan mukofot pullari bergani aks etgan video tarqalgach, ko‘pchilikning e’tirofi, e’tirozi va muhokamasiga sabab bo‘ldi. Ayrimlar pul manbasi bilan ham qiziqdi. “Daryo” jurnalisti Shuhrat Abdurahmonovning matbuot kotibi Muslimbek Ibrohimov bilan bog‘lanib, mukofot pullarining manbasiga aniqlik kiritdi.
Bu pullar ishchilarning maoshidan tashqari, qo‘shimcha mukofot pullari bo‘lib, homiylik mablag‘lari hisoblanadi. Shu sabab bundan nafaqat ishchilar, o‘sha yerda turganlarning barchasi xursand bo‘lib ketdi. Viloyat hokimi ishchilarning sovuqda ishlayotganini ko‘rib, ularni rag‘batlantirdi. Ularning maoshi qo‘shimcha tarzda plastik kartochkasiga tushaveradi, bu pullar oylik maoshidan ushlab qolinmaydi, — deydi viloyat hokimining matbuot kotibi Muslimbek Ibrohimov.
Mas’ulning bildirishicha, Shuhrat Abdurahmonov suvchilarni mukofotlashdan tashqari, ularning ishiga kerak bo‘luvchi texnikalari va maxsus kiyim-kechaklarini yaxshilash bo‘yicha ham rahbarlarga topshiriq bergan.
Viloyat hokimi o‘sha yerning o‘zida ishchilarning kiyim-kechagi, ish qurollarini yangilash va ularning moliyaviy manbasi haqida aytib, rahbarlarga topshiriq berdi. Shuningdek, suvchilarga Yangi yil bayrami oldidan qo‘shimcha e’tibor bo‘lishini, yordam berilishini aytdi, — deydi Abdurahmonovning matbuot kotibi.
Aniqlanishicha, Shuhrat Abdurahmonov ko‘chada ishlayotgan suvchilarni ko‘rgach, 64 million so‘m naqd pulni olib, 16 nafar suvchiga 4 million so‘mdan tarqatib bergan.
