Turkmaniston delegatsiyasi “Tolibon” bilan Afg‘onistondagi yirik qo‘shma loyihalarni muhokama qildi

2023-yilning 16–17-dekabr kunlari Turkmaniston tashqi ishlar vaziri Rashid Meredov qo‘shma loyihalarni muhokama qilish maqsadida Afg‘onistonning Hirot viloyatiga amaliy tashrif bilan bordi.

Turkmaniston Tashqi ishlar vazirligining xabar berishicha, tomonlar “Turkmaniston—Afg‘oniston—Pokiston—Hindiston (TAPI) gaz quvuri, Turkmaniston—Afg‘oniston—Pokiston (TAP) yuqori voltli elektr uzatish liniyasi loyihalarini amalga oshirishning joriy holatini, Afg‘oniston temiryo‘l infratuzilmasini kengaytirish” masalalarini muhokama qilgan.

Turkmaniston delegatsiyasi Afg‘onistonning qator rasmiylari: tashqi ishlar vaziri Amirxon Muttaqiy, konchilik vaziri Shahabutdin Delavar, sanoat va savdo vaziri Nurettin Aziziy bilan uchrashuvlar o‘tkazgan.

Mutaxassislarning “Daryo”ga ma’lum qilishicha, ikki davlat uchun strategik ahamiyatga ega loyiha TAPI gaz quvuri qurilishi bo‘lib, quvur bo‘ylab yo‘l infratuzilmasi va elektr tarmog‘ini barpo etish rejalashtirilgan.

Yiliga 33 milliard kub metr gaz o‘tkazish quvvatiga ega gaz quvuri qurilishi 2015-yil dekabr oyida boshlangan. Bu davrda Turkmaniston tomoni Afg‘oniston chegarasiga liniyali quvur olib keldi va xomashyo manbai — supergigant Galkinish konini qazishga kirishdi.

Afg‘oniston hududida uzunligi 800 kilometrdan ortiq bo‘lgan TAPI Hirot, Farah, Nimro‘z, Hilmand va Qandahor viloyatlarini qamrab olishi kerak.

Yaqinda “Tolibon” hukumati o‘z hududidagi TAPI loyihasi uchun mablag‘ to‘lashga tayyorligini bildirdi. Bu haqda mamlakat Konchilik va neft vazirligi vakili Homoyun Afg‘on ma’lum qildi.