Isroil G‘azo markazida yangi gumanitar pauza e’lon qildi

Isroil armiyasi mahalliy aholiga yordam berish uchun G‘azo sektori markazida to‘rt soatlik gumanitar pauza e’lon qildi.

Bu haqda Isroil hukumatining Falastin hududlaridagi faoliyatini muvofiqlashtirish boshqarmasi X ijtimoiy tarmog‘idagi (sobiq Twitter) sahifasida ma’lum qilgan.

“Isroil armiyasi tinch aholiga oziq-ovqat va suv zaxiralarini to‘ldirishga imkon berish uchun taktik pauzalarni amalga oshirmoqda. Bugun, 25-dekabr kuni Dayrdagi Al-Shayx Muhammad al-Yamaniy hududida gumanitar pauza o‘rnatilmoqda, deyiladi xabarda.

Isroil 24-noyabr kuni HAMAS bilan janglarni vaqtincha to‘xtatdi, shundan so‘ng sulh ikki marta uzaytirildi — avvaliga ikki kunga, keyin yana bir kunga. 1-dekabr kuni ertalab uning muddati tugadi va janglar yana davom etdi.