Rossiya Finlyandiya bilan chegarasiga yangi gaubitsalarini joylashtiradi 

Rossiya tez orada o‘zining eng so‘nggi gaubitsalarini Finlyandiya va Norvegiya bilan chegaradosh Shimoliy harbiy okrugda joylashtiradi. Bu haqda “Rostex” rahbari Sergey Chemezovga tayanib, Reuters xabar berdi.

Ma’lum qilinishicha, yangi Koalitsiya–SV o‘ziyurar artilleriya tizimlarining sinovlari yakunlangan va ularni seriyali ishlab chiqarish allaqachon boshlangan. Birinchi sinov partiyasi 2023-yilning oxirigacha yetkazib beriladi.

“Menimcha, ular yaqin kelajakda u yerda (Shimoliy harbiy okrugda) paydo bo‘ladi, chunki bu toifadagi gaubitsalar o‘q otish masofasi bo‘yicha G‘arb artilleriya modellaridan ustunlikni ta’minlash uchun kerak”, — dedi Chemezov.

Rossiyaning Koalitsiya-SV gaubitsalari 70 kilometrgacha otish masofasiga ega, 152 mm kalibrli zamonaviy 2A88 pushka bilan jihozlangan, o‘q otish tezligi daqiqasiga 10 tani tashkil qiladi.