Kim Chen In armiyani ehtimoliy urushga tayyorgarlikni kuchaytirishga chaqirdi

Shimoliy Koreya armiyasi va mudofaa sanoati ehtimoliy urushga tayyorgarlik sa’y-harakatlarini kuchaytirishi kerak, dedi mamlakat yetakchisi Kim Chen In.

“Xalq armiyasi, harbiy sanoat, yadro quroli va fuqaro mudofaasiga urushga tayyorgarlikni yanada jadallashtirish bo‘yicha jangovar topshiriqlar berildi”, — deyiladi Koreya markaziy axborot agentligi (KCNA) xabarida.

21-noyabr kuni Shimoliy Koreya “Manrigyon-1” razvedka sun’iy yo‘ldoshini uchirgandi. O‘shanda KCNA ushbu amaliyot mamlakatning ehtimoliy “dushman tajovuziga” tayyorligini oshirishi haqida yozdi. Keyinroq Shimoliy Koreya mamlakat sun’iy yo‘ldoshlari faoliyatiga aralashishni urush e’lon qilish sifatida ko‘rishi haqida ogohlantirdi.

Sun’iy yo‘ldosh uchirilganidan so‘ng, Oq uy bu harakatni BMT Xavfsizlik Kengashi rezolyutsiyalarini buzish sifatida qoraladi, chunki unda hujjat bilan taqiqlangan ballistik raketa texnologiyasidan foydalanilgan.