Fuqaro bir vaqtning o‘zida ikki turdagi pensiya olishi mumkinmi?
Ayrim holatlarda fuqarolarda bir vaqtning o‘zida ikki turdagi pensiyani olish uchun huquqi paydo bo‘ladi. Bunday vaziyatlarda fuqarolarga qanday pensiya tayinlanadi?
Pensiya jamg‘armasining maʼlum qilishicha, “Fuqarolarning davlat pensiya taʼminoti to‘g‘risida”gi qonunning 4-moddasida davlat pensiyalarining turli xillarini olish huquqiga ega bo‘lgan fuqarolarga ularning o‘zlari tanlagan bitta pensiya tayinlanadi.
“Yaʼni agar fuqarolarda ikki yoki undan ortiq pensiyani olish uchun huquq paydo bo‘lganda, yuqoridagi qonun moddasiga asosan fuqaroning tanlovi bilan faqat bitta turdagi pensiyani olishi mumkin bo‘ladi”, — deya eslatib o‘tdi jamg‘arma.
Avvalroq yoshga doir pensiyaga muddatidan avval chiqish borasida maʼlumot berilgandi. Unga ko‘ra, texnologiyadagi, ishlab chiqarish va mehnatni tashkil etishdagi o‘zgarishlar, xodimlar soni yoki ish xususiyatining o‘zgarishiga olib kelgan ishlar hajmining qisqargani yoxud korxonaning tugatilgani munosabati bilan ishdan ozod etilgan va ishsiz deb eʼtirof etilgan shaxslar:
erkaklar — 58 yoshga to‘lganda va ish staji kamida 25 yil bo‘lgan taqdirda;
ayollar — 53 yoshga to‘lganda va ish staji kamida 20 yil bo‘lgan taqdirda pensiya olish huquqiga ega bo‘ladi.
Qonunchilikka binoan, yoshga doir pensiyaga erkaklar 60 yoshda, ish staji kamida 25 yil bo‘lganda chiqishi mumkin. Ayollar esa 55 yoshda, ish staji kamida 20 yil bo‘lgan taqdirda shunday turdagi pensiya olish huquqiga ega bo‘ladi.
Pensiya tayinlash uchun yetarlicha ish stajiga ega bo‘lmagan shaxslarga yoshga doir pensiyalar kamida 7 yil ish staji mavjud bo‘lgan taqdirda, bor stajga mutanosib miqdorda tayinlanadi.
