Yoshga doir pensiyaga muddatidan avval chiqish mumkinmi?
“Hozirda 58 yoshdaman, ishlayotgan korxonam tugatilganligi munosabati bilan ishsiz qolganman. Men shu yoshda ham yoshga doir pensiyaga muddatidan oldin chiqishim mumkinmi”, deya savol yo‘llagan fuqarolardan biri Pensiya jamg‘armasiga.
Jamg‘armaning maʼlum qilishicha, texnologiyadagi, ishlab chiqarish va mehnatni tashkil etishdagi o‘zgarishlar, xodimlar soni yoki ish xususiyatining o‘zgarishiga olib kelgan ishlar hajmining qisqargani yoxud korxonaning tugatilgani munosabati bilan ishdan ozod etilgan va ishsiz deb eʼtirof etilgan shaxslar:
- erkaklar — 58 yoshga to‘lganda va ish staji kamida 25-yil bo‘lgan taqdirda;
- ayollar — 53 yoshga to‘lganda va ish staji kamida 20-yil bo‘lgan taqdirda pensiya olish huquqiga ega bo‘ladi.
Qonunchilikka binoan, yoshga doir pensiyaga erkaklar 60 yoshda, ish staji kamida 25 yil bo‘lganda chiqishi mumkin. Ayollar esa 55 yoshda, ish staji kamida 20 yil bo‘lgan taqdirda shunday turdagi pensiya olish huquqiga ega bo‘ladi.
Pensiya tayinlash uchun yetarlicha ish stajiga ega bo‘lmagan shaxslarga yoshga doir pensiyalar kamida 7 yil ish staji mavjud bo‘lgan taqdirda, bor stajga mutanosib miqdorda tayinlanadi.
