Janubiy Koreya va AQSH Shimoliy Koreya bilan chegara yaqinida harbiy mashg‘ulotlar o‘tkazdi
Janubiy Koreya qo‘shinlari Shimoliy Koreya bilan chegara yaqinida og‘ir qurollardan foydalangan holda AQSH bilan qo‘shma harbiy mashg‘ulotlar o‘tkazdi. Bu haqda Reuters axborot agentligi xabar berdi.
Janubiy Koreya armiyasining motoo‘qchi brigadasi va AQSH armiyasining Striker zirhli brigadasi o‘rtasida o‘tkazilayotgan mashg‘ulotlar jangovar tayyorgarlikni sinovdan o‘tkazish va yaxshilashga qaratilgan.
Mashqlar bir hafta — 29-dekabrdan 4-yanvargacha davom etdi. Ittifoqchilar o‘tgan yili Koreya yarim orolida keskinlik kuchaygani fonida qo‘shma mashg‘ulotlar hajmi va intensivligini oshirdi. Bunga Pxenyan uzoq masofaga uchuvchi ballistik raketalarni, shuningdek, Tinch okeanidagi nishonlarni urish uchun mo‘ljallangan taktik qurollarni qo‘llagani sabab bo‘ldi.
Qo‘shma mashg‘ulotlarda 110 dan ortiq harbiy texnika, jumladan, Janubiy Koreya armiyasining tanklari, zenit-artilleriya va yer qazuvchi jangovar mashinalari, shuningdek, Amerika hujumchi samolyotlari va zirhli jangovar mashinalari ishtirok etdi.
