Amir Xonning o‘zidan 27 yosh kichik sevgilisi — “Dangal” filmi yulduzi Fotima Sana Shayx haqida nimalar ma’lum?
Fotima Sana Shayx ekranda sportchi Gita Fogat obrazini aks ettirgan “Dangal” filmidagi mahoratli ijrosi tufayli tomoshabinlar e’tiborini tortadi. U, shuningdek, aktyor Amir Xonning qalbini ham zabt etadi. Ular orasidagi 27 yoshli farq aktyorning ikkinchi xotini Kiran Rao bilan ajrashishiga to‘sqinlik qilmadi.
Fotima Sana Shayx Bollivuddagi eng istiqbolli aktrisalardan biri. Fotima 1992-yil 11-yanvarda Andhra-Pradesh shtatining Haydarobod shahrida tug‘ilgan. Uning otasi Vipin Sharma kashmirlik hind, onasi Raj Tabassum esa shrinagarlik musulmon.
Qizi tug‘ilgandan so‘ng, ota-onasi Mumbayga ko‘chib keladi va Fotima shu yerda o‘sib, ta’lim oladi. Qiz kinodagi faoliyatini 5 yoshida boshlagan va ko‘plab yulduzli filmlarda rol o‘ynagan. Rejissorlar uning xarizmasi va jozibasini o‘sha paytdayoq payqagan.
Yosh aktrisani Shohrux Xon, Juxi Chavla va Jeki Shroff ishtirokidagi “Vasiylik” yoki “Yolg‘iz qolganda” filmlarida ham ko‘rish mumkin. Ushbu filmda suratga tushganidan so‘ng, Shayx o‘qishga e’tibor qaratish uchun filmlardan tanaffus oladi. Bir muncha vaqt o‘tgach, u shou-biznesga qaytadi, bu Fotima uchun unchalik oson bo‘lmagan. Ko‘p kastinglarga qaramay, aktrisaga uzoq vaqtgacha rol berilmaydi.
U “Akash va Vani”, “Haqiqiy professional”, “Tahan” kabi loyihalarda faqat kichik rollarni o‘ynagan. Bo‘sh vaqtini bekor o‘tkazmaslik uchun Fotima fotograf bo‘lib ishlay boshlaydi. U shuningdek, ikkita reklama roliklarida operator bo‘lib ham ishlagan va bir nechta teleseriallarda suratga tushgan.
Sana Shayxga haqiqiy mashhurlikni 2015-yilda — Amir Xon bilan birga o‘ynagan Nitesh Tivarining “Dangal” dramasi olib keldi. Film Haryana shtatidagi Balali qishlog‘ida yashovchi sobiq kurashchi Mahavir Singx Fogatning hayoti haqida bo‘lib, u qizlari Gita va Babitaga erkaklar ishtirok etadigan sportda tarixiy g‘alabalarni qo‘lga kiritishlarida yordam beradi.
Hamdo‘stlik o‘yinlarida kurash bo‘yicha Hindiston tarixidagi birinchi oltin medalni qo‘lga kiritgan Gita Fogat roli uchun dastlab Taapsi Pannu va Kangana Ranaut ko‘rib chiqiladi, shuning uchun Fotimaning tanlanishi kutilmagan bo‘ladi.
Shayx o‘zining hamkasbi Soniya Malhotra bilan birga besh karra kastingdan o‘tadi. Keyin mashaqqatli jismoniy mashg‘ulotlar va aktyorlik mahorati darslari bo‘ladi. Soniya Malhotra uchun “Dangal” debyut film edi. Film 2016-yilda ekranlarga chiqadi va katta tanqidlarga uchraydi, ammo eng yuqori daromad keltirgan hind filmiga aylanadi.
Aynan shu filmning suratga olish maydonchasida Amir Xon 24 yoshli Fotimaning jozibasiga maftun bo‘lgani haqida mish-mishlar tarqaladi. Aktyorning ikkinchi xotini Kiran Rao bilan ajralishi esa olovga moy quyadi. Ijtimoiy tarmoqlarda Shayx va Xonning qo‘llarini mahkam ushlagan suratlari paydo bo‘ladi, biroq juftlik o‘rtalaridagi munosabatlarga izoh bermaslikni maʼqul ko‘radi.
“Dangal”dan so‘ng darhol Amir Xon o‘zining navbatdagi loyihasi “Hindiston to‘dalari” filmida Fotima bilan suratga tushadi. Unda qiz aktyorning sevgilisi malika Zafira rolini o‘ynaydi. Afsuski, katta budjetga hamda Amirdan tashqari Amitabh Bachchan va Katrina Kaifni o‘z ichiga olgan yulduzlar tarkibiga qaramay, film Hindistonda muvaffaqiyat qozonmaydi — kartina kassada muvaffaqiyatsizlikka uchraydi.
Bunday omadsizlikdan keyin Fotima “Ludo”, “Yo‘lovchi” va “Sayohat” kabi kichikroq loyihalarda ishtirok etadi. O‘tgan yili aktrisa Hindistonning birinchi feldmarshali Sem Manekshou hayotiga asoslangan “Sem Bahodur” biografik jangari dramasida rol o‘ynadi. Unda Fotima Indira Gandi rolini ijro etgan.
“Sem Bahodur” kassada Ranbir Kapurning mega blokbasteri “Hayvon” bilan bir vaqtda ekranlarga chiqqaniga qaramay, kinoteatrlarda yaxshi ketadi va xit deb e’lon qilinadi.
“Laal Singh Chadda” filmi muvaffaqiyatsizlikka uchragach, aktyorlik faoliyatida tanaffus qilgan Amir Xon hozirda katta ekranga qaytishga tayyor. Tabiiyki, u Fotima Sana Shayxni o‘ziga partnyor qilib oldi. Ularning birgalikdagi yangi filmiga Advait Chandan rejissorlik qiladi va suratga olish ishlari 2024-yilning birinchi yarmida boshlanishi rejalashtirilgan.
Juftlik munosabatlarini yashirmaydi, garchi ular buni omma oldida tan olmasalar ham — Fotima hamisha Amirning yonida bo‘lib, uning barcha oilaviy bayramlarida qatnashadi.
