Entoni Blinken: “Isroil G‘azo bo‘yicha BMT bilan hamkorlik qilishi kerak”
Isroil G‘azo sektoridagi falastinliklarga samarali yordam bera oladigan yagona tashkilot bo‘lgani uchun BMT bilan hamkorlik qilishi kerak. Bu haqda AQSH davlat kotibi Entoni Blinken NBC telekanaliga bergan intervyusida ma’lum qilgan.
“Isroil BMT bilan hamkorlik qilishi kerak. Yetkazib berilayotgan yordamning muhtojlarga yetib borishini ta’minlashi kerak. BMT — yordamni yetkazish uchun yagona variant. Uning xodimlari urush sharoitida odamlarga yordam berishda jasorat ko‘rsatmoqdalar.
Ular aql bovar qilmaydigan ishlarni qilmoqdalar, ular bilan hamkorlik zarur, chunki boshqa alternativa yo‘q, boshqa tanlov ham yo‘q. Bu ishlarni boshqa hech kim qilmaydi. Agar BMT qilmaganda, bu ishlarni bajarish Isroilning mas’uliyatida bo‘lardi”, — dedi u.
Blinken 4-yanvardan 11-yanvargacha Yaqin Sharq va qo‘shni davlatlar bo‘ylab safar uyushtirmoqda. U Turkiya, Gretsiya, Iordaniya, BAA, Saudiya Arabistoni va Isroil rahbarlari bilan allaqachon uchrashuv o‘tkazdi.
