Italiya husiylarga qarshi hujumlarda qatnashishdan bosh tortdi — OAV
AQSH va Buyuk Britaniya Italiyadan Yamandagi husiylarga zarba berishda ishtirok etishni so‘radi, biroq rad javobini oldi. Bu haqda hukumatdagi manbaga tayanib, Reuters xabar berdi.
“Italiya AQSH va Buyuk Britaniyaning Yamandagi husiy obyektlariga qarshi tungi zarbalarida ishtirok etishdan bosh tortdi”, — deyiladi xabarda.
Reuters suhbatdoshiga ko‘ra, Rim Qizil dengizda “tinchlantiruvchi” siyosat yuritishni afzal ko‘rmoqda. Bundan tashqari, hukumat har qanday harbiy harakatlarda ishtirok etishi uchun parlament yordamiga muhtoj bo‘lib, tezkor qaror qabul qila olmaydi.
AQSH va Britaniyaning husiy obyektlariga hujumi
AQSH va Buyuk Britaniya 12-yanvar kuni Yamanning turli hududlaridagi to‘rt provinsiya, jumladan, poytaxt Sana, Hodeyda, Taiz va Saadadagi nishonlarga havo hujumi uyushtirdi. Husiylar javob zarbalari berilishidan ogohlantirdi.
“Biz Yamanga qarshi bu tajovuzni mutlaqo oqlab bo‘lmasligini tasdiqlaymiz, chunki Qizil va Arab dengizlarida xalqaro yuk tashish uchun hech qanday tahdid yo‘q edi”, — dedi husiylar matbuot kotibi Muhammad Abdulsalom.
O‘z navbatida, Yaman husiylari o‘z nazorati ostidagi hududlarda majburiy safarbarlik e’lon qildi.
“Bizning xalqimiz ko‘plab viloyatlarda harbiy safarbarlik tadbirlariga o‘tdi, safarbarlar soni esa minglab”, — dedi “Ansor Alloh” harakati yetakchisi Abdel Malek al-Husiy.
U husiylar tarafdorlarini qiyin vaziyatga qaramay, harbiy tayyorgarlik va namoyishlarni davom ettirishga, shuningdek, pul xayriya qilishga chaqirdi.
