“Yuqori tovon to‘lashadi”: Yaman husiylari majburiy safarbarlik e’lon qildi
Yamanning “Ansor Alloh” (husiylar) guruhi ularga zarbalar bergani uchun AQSH va Buyuk Britaniya “yuqori tovon” to‘lashidan ogohlantirdi. Bu haqda “RIA Novosti” xabar berdi.
“Mamlakatimiz Amerika va Britaniya kemalari, suvosti kemalari va harbiy samolyotlari tomonidan amalga oshirilgan yirik tajovuzkor hujumga uchradi. Shubhasiz, Amerika va Britaniya ushbu ochiq-oydin agressiyaning barcha dahshatli oqibatlarini o‘z zimmasiga olishga va yuqori tovon to‘lashga tayyor bo‘lishi kerak”, — dedi “Ansor Alloh” hukumatidagi tashqi ishlar vazirining o‘rinbosari Husayn al-Ezziy.
Husiylar AQSH va Britaniyaning havo hujumlari oqibatida Yamanda odamlar halok bo‘lgani va yaralanganini ma’lum qildi.
“Reydlar natijasida besh kishi halok bo‘ldi, qurolli kuchlarimizning yana olti nafar a’zosi yaralandi”, — deydi Yaman armiyasi matbuot kotibi Yahyo Sari.
U Yaman qurolli kuchlari Yaman, uning suvereniteti va mustaqilligini himoya qilish uchun quruqlikdagi va dengizdagi tahdid manbalari va barcha dushman nishonlariga zarba berishdan tortinmasligini aytdi. Shuningdek, husiylar zarbalar G‘azo sektorini qo‘llab-quvvatlashga to‘sqinlik qilmasligini bildirdi.
“Biz Yamanga qarshi bu tajovuzni mutlaqo oqlab bo‘lmasligini tasdiqlaymiz, chunki Qizil va Arab dengizlarida xalqaro yuk tashish uchun hech qanday tahdid yo‘q edi”, — dedi husiylar matbuot kotibi Muhammad Abdulsalom.
O‘z navbatida, Yaman husiylari o‘z nazorati ostidagi hududlarda majburiy safarbarlik e’lon qildi.
“Bizning xalqimiz ko‘plab viloyatlarda harbiy safarbarlik tadbirlariga o‘tdi, safarbarlar soni esa minglab”, — dedi “Ansor Alloh” harakati yetakchisi Abdel Malek al-Husiy.
U husiylar tarafdorlarini qiyin vaziyatga qaramay, harbiy tayyorgarlik va namoyishlarni davom ettirishga, shuningdek, pul xayriya qilishga chaqirdi.
