Finlyandiya hukumati rossiyaliklar uchun ko‘chmas mulk bilan bog‘liq operatsiyalarni butunlay taqiqlashga qaror qildi
Finlyandiya hukumati 2024-yil bahorida Rossiya fuqarolari uchun ko‘chmas mulk bilan bog‘liq operatsiyalarni to‘liq taqiqlashni rejalashtirmoqda, dedi mamlakat mudofaa vaziri Antti Xakkanen.
Amaldorning mahalliy Helsingin Sanomat nashriga ma’lum qilishicha, hozirda ushbu taqiqni joriy qilish uchun zarur qonuniy asoslarni izlash davom etmoqda.
“Bahorda muayyan qarorlar qabul qilinishi mumkin. Rossiya Federatsiyasi fuqarolari uchun Finlyandiyada tranzaksiyalarni to‘liq taqiqlashdan tashqari, rossiyaliklarga sotilgan ko‘chmas mulk obyektlari bo‘yicha ham tergov o‘tkaziladi”, — dedi Xakkanen.
Uning so‘zlariga ko‘ra, yangi cheklovlarni joriy etish uchun Finlyandiya hukumatining qarori yetarli, parlament orqali qonunchilikka o‘zgartirishlar kiritish shart emas.
Finlyandiya mudofaa vazirining ta’kidlashicha, Yevropa Ittifoqining Rossiyaga qarshi sanksiyalarining 12-paketi doirasida Xelsinki sanksiyaga tushgan shaxslarga tegishli ko‘chmas mulk va biznesni musodara qilish imkoniyatiga ega.
