Germaniya mudofaa vaziri: “Rossiya 5-8 yil ichida NATO davlatiga hujum qilishi mumkin”

Germaniya mudofaa vaziri Boris Pistorius Rossiyaning NATO davlatiga hujumi besh-sakkiz yil ichida amalga oshishi mumkinligini aytdi. Bu haqda Bild xabar berdi.

“Biz deyarli har kuni Kremldan tahdidlarni eshitamiz — bu so‘nggi vaqtlarda yana Boltiqbo‘yi mamlakatlaridagi do‘stlarimizga qaratilgan. Shuning uchun Vladimir Putin kun kelib NATO davlatlaridan biriga hujum qilishi mumkinligini hisobga olishimiz kerak. Mutaxassislarimiz buni besh-sakkiz yil ichida amalga oshirish mumkinligini taxmin qilmoqda”, — dedi Germaniya mudofaa vaziri.

Boris Pistorius hozir hujum ehtimoli borligiga ishonmasligini ta’kidladi. U mudofaa sanoatini kuchaytirish orqali ehtiyot choralarini oldindan ko‘rishga chaqirdi. Qolaversa, u majburiy harbiy xizmatni joriy etish g‘oyasini ilgari surgan va aprel oyiga qadar vazirlikdan tegishli taklifni kutmoqda. 

Vazir nemis pasporti bo‘lmagan askarlar uchun qurolli kuchlarga kirish imkoniyatini ochishga tayyorligini aytdi. 

“Biz Yevropada buni amalga oshirgan birinchi harbiy kuch bo‘lmaymiz. Mamlakatda Germaniyada ikkinchi yoki uchinchi avlodda yashaydigan, ammo hali Germaniya fuqaroligiga ega bo‘lmagan odamlar bor”, — dedi Pistorius.