Amaldagi Konstitutsiya (2021-yil aprel oyida qabul qilingan) bir shaxsga ikki marta olti yilgacha prezidentlik lavozimini egallash imkonini beradi. Qirg‘izistonda navbatdagi prezidentlik saylovlari 2027-yil yanvarda bo‘lib o‘tishi rejalashtirilgan.
Sadir Japarov ikkinchi prezidentlik muddatiga nomzodini qo‘yishi tasdiqlandi
Qirg‘iziston prezidenti Sadir Japarov ikkinchi prezidentlik muddatiga nomzodini qo‘yishi tasdiqlandi. Bu haqda prezident matbuot kotibi Askat Alagozovga tayanib, 24.kg xabar berdi.
“Mamlakatimiz uchun strategik ahamiyatga ega bo‘lgan uzoq muddatli xalqaro loyihalar yo‘lga qo‘yilayotgani va rejalashtirilayotganini inobatga olsak, Sadir Japarovning ikkinchi muddatga saylovda ishtirok etishi siyosatdagi izchil qadam bo‘ladi”, — deya izoh berdi Askat Alagozov.
Avvalroq Vazirlar Mahkamasi raisi o‘rinbosari Edil Baysalov “Ozodlik radiosi”ga bergan intervyusida Sadir Japarovning ikkinchi muddatga nomzodini qo‘yish rejalari haqida ma’lum qilgandi.
“Prezidentimiz navbatdagi saylovlarda ishtirok etadi. Konstitutsiya bunga yo‘l qo‘yadi. U boshlagan ishini yarim yo‘lda qoldirmaydi. Xalq esa bunga yo‘l qo‘ymaydi. Kelgusi uch yilda xalq ko‘p yutuqlarga guvoh bo‘ladi”, — degan Baysalov.
Ungacha Sadir Japarov ham, uning administratsiyasi ham navbatdagi prezidentlik saylovlarida ishtirok etish bo‘yicha bayonot bermagan edi. 2023-yil dekabr oyi o‘rtalarida Milliy xavfsizlik davlat qo‘mitasi rahbari Qamchibek Tashiyev Sadir Japarov ikkinchi muddatga saylanishiga ishora qilgan edi.
Izoh
Kirish
Asosiy yangiliklar
