Ronaldu va Messi ishtirokida “so‘nggi raqs” bo‘lmaydi. Krishtianu jarohati sababli “Inter Mayami”ga qarshi bahsni o‘tkazib yuboradi 

“An-Nassr” hujumchisi Krishtianu Ronaldu “Inter Mayami”ga qarshi o‘yinda ishtirok etmaydi.

Bu haqida “An-Nassr” bosh murabbiyi Luish Kashtru ma’lum qildi.

Saudiya va AQSH jamoasi 1-fevral, payshanba kuni o‘rtoqlik o‘yini o‘tkazadi. Uchrashuv Toshkent vaqti  bilan 23:00 da start oladi. 

Portugaliyalik futbolchida kichik jarohat mavjud.

“Biz Ronaldu va Messi qarama-qarshiligini ko‘rmaymiz. Krishtianu jarohatidan tuzalishi lozim.

Yaqin bir necha kun ichida u umumiy guruh mashg‘ulotlariga qaytishiga umid qilamiz. Bu uchrashuvda Ronalduni ko‘rmaymiz”, — deb aytib o‘tdi Kashtru.

Eslatib o‘tamiz, “Inter Mayami” Saudiyada o‘rtoqlik o‘yinlari o‘tkazmoqda. 29-yanvar kuni AQSH klubi “Al-Hilol”ga qarshi bahs olib borib, 3:4 hisobida mag‘lub bo‘lgandi.