Yevropa Ittifoqi va Jahon banki Ukraina uchun 500 million yevrolik investitsiya shartnomasini imzoladi
Yevropa Ittifoqi va Jahon banki guruhiga aʼzo bo‘lgan Xalqaro moliyaviy hamkorlik tashkiloti (IFC) Ukrainani rekonstruksiya qilish bo‘yicha 500 million yevrolik sarmoyaviy kelishuvni imzoladi. Bu haqda Yevropa komissiyasining Bryusselda eʼlon qilingan bayonotida aytiladi.
“Yevropa komissiyasi va Xalqaro moliyaviy hamkorlik (IFC) hozirgina Ukrainani inklyuziv va barqaror rekonstruksiya qilishni ta’minlashga yordam beradigan investitsiyalarni qo‘llab-quvvatlash bo‘yicha kafolat shartnomasini imzoladilar. Kelishuv doirasida YI 90 million yevrogacha moliyaviy yordam ajratadi.
Dastur doirasida jalb qilingan xususiy sektor investitsiyalari barcha sohalarda, jumladan, asosiy infratuzilmani yaratish va mahsulotlar ishlab chiqarish, dekarbonizatsiyani rag‘batlantirish hamda oziq-ovqatlar bilan ta’minlashga sarflanishi kutilmoqda”, — deyiladi YI bayonotida.
Avvalroq Yevropa Ittifoqi Rossiyaning muzlatilgan aktivlaridan tushgan daromadni Ukrainani qo‘llab-quvvatlashga yo‘naltirmoqchi ekanligi ma’lum qilingandi.
