“Tolibon” va O‘zbekiston ikkita temiryo‘l stansiyasini ishga tushirmoqchi 

“Tolibon” va O‘zbekiston “Naibobod” va “Port-5” temiryo‘l stansiyasini ishga tushirishga tayyorlanmoqda. Bu haqda Sputnik Afg‘oniston xabar berdi.

Tegishli masala masofaviy formatdagi muzokaralar davomida muhokama qilindi. Jumladan, “Tolibon” temiryo‘l boshqarmasi boshlig‘i Baxt ar-Rahmon Sharofat va “O‘zbekiston temir yo‘llari” AJ boshqaruv raisi Zufar Narzullaev muzokara olib bordi.

O‘zbekiston tomonidan 80 nafar mutaxassisdan iborat texnik delegatsiya Afg‘onistonga borishi kutilmoqda. “Tolibon” harakati ular uchun turistik vizalar va xavfsizlikni taʼminlaydi. Shuningdek, “Tolibon” O‘zbekiston, Pokiston va Qatar ishtirokida Toshkentda transafg‘on temiryo‘li loyihasi bo‘yicha o‘tkaziladigan yig‘ilishga taklif qilingani aytilmoqda.