Toshkentda 174 marotaba qoidabuzarlik sodir etib, jarima to‘lamagan haydovchining Lacetti’si xatlandi
Toshkentda yo‘l harakati qoidasini 174 marta buzgan haydovchiga nisbatan chora ko‘rildi. Bu haqda “Millar” informatsion dasturida ma’lum qilindi.
Qayd etilishicha, Lacetti haydovchisining 1 yil davomida to‘lanmagan ma’muriy jarimalari miqdori qariyb 59 million so‘mga yaqinlashgan. Shu sababli, MIB Shayxontohur tumani bo‘limi tomonidan avtomobili xatlanib, jarima maydonchasiga joylangan.
Qonunchilikka asosan qarzdorga o‘z qarzini to‘lashi uchun 15 kun muhlat berilgan. Ta’kidlanishicha, agar qarz to‘lanmasa, uning avtomobili auksion savdosiga chiqariladi va sotib yuboriladi. Tushgan mablag‘lar qarzini qoplash uchun sarflanadi.
Avvalroq Andijonda 27 ta mashinasi bor shaxsdan 81 ta qoidabuzarlik bo‘yicha jarima undirilgani, O‘zbekistonda mast holda mashina haydaganlarning transporti musodara etilishi haqidagi xabarlar rad etilgani to‘g‘risida xabar berilgandi.
