Pentagon rahbarining sog‘lig‘i haqida ma’lumot berildi
AQSH mudofaa vaziri Lloyd Ostin 13-fevralda o‘z vazifasiga qaytishi mumkin. Bu haqda Valter Rid tibbiyot markazi shifokorlari bayonotiga tayanib, AQSH Mudofaa vazirligi xabar berdi.
Ma'lum qilinishicha, Ostin umumiy anesteziya ostida jarrohlik bo‘lmagan muolajalarni o‘tkazgan. Shifokorlar qovuq bilan bog‘liq muammo AQSH mudofaa vazirining to‘liq tiklanishiga ta’sir qilmasligini aytmoqda. Saraton kasalligini davolash istiqbollari ijobiyligicha qolmoqda.
Lloyd Ostin qovug‘i bilan bog‘liq muammolar tufayli 12-fevral kuni qayta kasalxonaga yotqizilgan edi. Vazir o‘z vakolatlarini vaqtincha o‘zining o‘rinbosari Ketlin Hiksga topshirgan.
AQSH mudofaa vazirida qanday kasallik mavjud?
2023-yil dekabr oyining boshlarida Ostinda prostata saratoni borligi aniqlangandi. 22-dekabr kuni umumiy narkoz ostida undan o‘simta olib tashlangan, shundan keyin u kasalxonadan chiqqan. Biroq, 2024-yil 1-yanvarda u asoratlar tufayli qayta kasalxonaga yotqizilgan, uning qorin sohasi, bel va oyoq qismida kuchli og‘riq kuzatilgan. O‘shanda Pentagon rahbarida siydik yo‘llarining infeksiyasi aniqlangan.
Vazir to‘rt kun intensiv terapiya bo‘limida bo‘lgan. O‘shanda Pentagon prezident Jo Bayden va uning administratsiyasini bu haqda xabardor qilmagan. Oq uy bundan faqat 4-yanvar kuni xabar topgan. 23-yanvar kuni Ostin jamoatchilikka ko‘rinish bergan. OAV u vazn yo‘qotgani va holdan toygan ko‘rinishda bo‘lganini qayd etgan.
