Toshkentda taksi narxlari keskin ko‘tarildi
Toshkent shahrida taksi narxlari keskin ko‘tarilishi kuzatilmoqda. Bu esa ijtimoiy tarmoqlarda ko‘plab muhokamalarga sabab bo‘ldi.
O‘zbekistonning ko‘plab hududlarida bugun, 16-fevral kuni havo harorati keskin pasayib, qor yog‘moqda. Shu kabi Toshkent shahrida ham ayni damda havo harorati 1-2 daraja sovuqni ko‘rsatyapti. Hududlarda qor yog‘ishda davom etmoqda.
Tarmoqlarda noqulay ob-havo sharoiti sababli taksi narxlari ham keskin ko‘tarilayotgani haqida turli xabarlar tarqaldi. Ayni damda yo‘nalishsiz taksi chaqirish minimum narxi 20 ming so‘mni tashkil qilmoqda. Odatda bu narx 10 ming so‘mdan ortmas edi. Tarqalayotgan xabarlarga ko‘ra, Yashnobod tumanidan Chilonzor tumanigacha borish narxi 100 ming so‘mdan ortiqqa tushmoqda.
Shu bilan birgalikda, poytaxt ko‘chalarida katta tirbandliklar yuzaga kelgan. Yo‘l harakati xavfsizligi xizmati ob-havo sababli barcha haydovchilardan:
- boshqaruvdagi transport vositasining texnik sozligiga e’tiborli bo‘lib;
- oraliq masofani saqlab;
- tezlikni me’yordan oshirmasdan;
- gaz yoki tormoz tepkisini keskin bosmasdan;
- ehtiyotkorlik bilan harakatlanishlarini so‘ragan.
