“Ukraina mojarosida yadro qurolidan foydalanish uchun hech qanday asos yo‘q” — MAGATE rahbari
14-mart kuni Xalqaro atom energiyasi agentligi (MAGATE) bosh direktori Rafael Grossi Ukraina mojarosida yadro qurolidan foydalanish uchun hech qanday shart va sabab ko‘rmayotganini maʼlum qildi. Bu haqda “TASS” nashri batafsil xabar berdi.
“Agar biz Ukrainadagi urushni nazarda tutib aytadigan bo‘lsak, hozirda yadro qurolidan foydalanish uchun sabablarni ko‘rmayapmiz. Hozirda bu ehtimol juda past”, — degan MAGATE missiyasi rahbari Rafael Grossi.
Grossi, shuningdek, BMT Xavfsizlik Kengashining besh doimiy aʼzosigina xalqaro huquqqa ko‘ra yadro quroliga ega deb rasman tan olinganligini taʼkidladi. Bu beshlikning umumiy fikriga ko‘ra, yadro urushida g‘oliblar bo‘lmaydi. Bunday urushga aslo yo‘l qo‘ymaslik kerak.
Oldinroq, Rossiya prezidenti Vladimir Putin o‘z mamlakati yadroviy urush olib borishga to‘liq shay ekanligini maʼlum qilgan edi. Prezidentning bayonoti G‘arb siyosatchilarining keskin tanqidlariga uchragan.
