HAMAS o‘t ochishni to‘xtatish shartlarini Isroilga taqdim etdi
HAMAS vositachilar orqali Isroilga G‘azoda o‘t ochishni to‘xtatish kelishuviga javob berdi. Bu haqda Axios xabar berdi.
HAMAS Misr va Qatar vositachilariga garovga olinganlar bo‘yicha kelishuvni taqdim etdi, u o‘t ochishni to‘xtatish, garovga olinganlarni ozod qilish, G‘azoga gumanitar yordam yetkazish, ko‘chirilgan falastinliklarni uyiga qaytarish va isroillik harbiylarni anklavdan chiqarishni o‘z ichiga oladi.
Qatar bosh vaziri Muhammad bin Abdul Rahmon al Tani 14-mart kuni Isroilning Mossad razvedka agentligi direktori bilan gaplashdi va unga HAMASning javobini yetkazdi. HAMASning javobi birinchi marta Isroildagi ozod qilinishi kerak bo‘lgan mahbuslar sonini o‘z ichiga oladi.
Isroillik rasmiy HAMAS ozod qilishni talab qilayotgan mahbuslar soni juda ko‘pligini aytmoqda. Biroq, HAMASning javobi allaqachon jiddiy muzokaralarga olib kelishi mumkin. Isroil harbiy vazirlar mahkamasi 15-mart kuni yig‘ilib, HAMASning javobini muhokama qilishi va keyingi qadamlar haqida qaror qabul qilishi kutilmoqda.
