G‘azoga dengiz orqali ilk gumanitar yordam yetib keldi
Gumanitar yordam yuklangan Open Arms kemasi G‘azo sektori qirg‘oqlariga yetib keldi, deya xabar berdi Euronews.
Birinchi yordam kemasi yangi dengiz yo‘lagi bo‘ylab G‘azo sektori qirg‘oqlariga 15-mart kuni yetib kelgan. Bu AQSH prezidenti Jo Baydenning gumanitar yordam yetkazib berish uchun dengiz yo‘lagi yaratish qaroridan keyin G‘azoga yuborilgan birinchi kemadir. Open Arms gumanitar tashkilotiga ko‘ra, bortda ikki yuz tonna oziq-ovqat bor. Kema Isroil harbiylari hamrohligida yetib kelgan.
BMTga ko‘ra, G‘azo aholisining to‘rtdan bir qismi to‘yib ovqatlanmaslikdan aziyat chekmoqda. G‘azo aholisiga havo orqali ham yordam tashlanmoqda. Biroq gumanitar tashkilotlar dengiz va havo orqali zaruriy yuklarni yetkazib berish samarali emasligini aytib, Isroilni yordam yetkazish uchun xavfsiz yo‘laklar yaratishga chaqirmoqda.
Avvalroq Pentagon gumanitar yordamni G‘azo sektori qirg‘oqlari yaqinida yirik kemalardan kichik kemalarga qayta yuklash yoki avval G‘azoga tashish uchun Isroil va Misrga gumanitar yuklarni yetkazib berish taklif qilgan edi. Isroil Tashqi ishlar vazirligi ham bunday harakatni qo‘llab-quvvatlashini bildirgan.
