Rossiyada FXX vertolyoti qulab tushdi, bortdagilar halok bo‘lgan (video)
Chelyabinsk viloyatida Rossiya Federal xavfsizlik xizmatiga tegishli Mi-8 vertolyoti qulab tushdi. Bu haqda “TASS” xabar berdi.
Vertolyot Prudniy qishlog‘i yaqinidagi o‘rmonga qulab tushgan. Samolyot bortida to‘rt kishidan iborat ekipaj bo‘lgan, ularning barchasi halok bo‘lgan. Aviahalokat Mi-8 ning o‘quv parvozida sodir bo‘lgan.
“RIA Novosti” xabariga ko‘ra, hodisaga texnikaning nosozligi sabab bo‘lgan. Mash Telegram kanali esa vertolyot yomon ko‘rish sharoitida yuqori voltli liniya bilan tutashgani, bortda uch kishi — instruktor va ikki kursant bo‘lganini yozmoqda.
112 Telegram kanali ham halokatga uchragan Mi-8 ekipaji uch kishidan iborat bo‘lganini xabar qilgan.
Bungacha Rossiyaning Tver viloyatida 23-avgust kuni Prigojinga tegishli samolyot qulab tushgandi. Oqibatda bortdagi o‘n kishi halok bo‘lgan, ular orasida “Vagner” rahbari va uning o‘rinbosari ham bor.
