“Baxtli yakun bo‘lmaydi”: Zelenskiy Ukraina armiyasining qarshi hujumi haqida gapirdi
Ukraina prezidenti Vladimir Zelenskiy CNN telekanaliga bergan intervyusida Ukraina Qurolli kuchlarining qarshi hujumini baxtli yakun bilan tugaydigan film emasligini aytdi.
“Biz hammamiz muvaffaqiyat va baxtli yakunga erishmoqchimiz. Lekin bu bir yarim soatlik film emas. Bu qarshi hujumdir. U baxtli yakunga ega film emas. Bizda baxtli yakun bo‘lmaydi.
Ko‘p odamlarni yo‘qotdik, buni tan olishimiz kerak. G‘alaba — deokkupatsiyaga olib keladigan va Rossiyaga boshqa mamlakatlarga: Boltiqbo‘yi mamlakatlariga, Polshaga hujum qilish va barchamizni Sovet Ittifoqiga qaytarish imkoniyatini bermaydigan yagona yo‘l”, — dedi u.
Ukraina qarshi hujumi
Ukraina qurolli kuchlarining qarshi hujumi 2023-yilning yozida boshlandi. Tez orada xorijiy matbuot sahifalarida qarshi hujum tanqid qilina boshlandi. Iyun oyida Ukraina prezidenti Vladimir Zelenskiy hujum, jumladan, yirik minalangan maydonlar tufayli “xohlagandan ko‘ra sekinroq” ketayotganini aytdi. Sentyabr oyi boshida Ukraina qurolli kuchlari janubiy frontda rus qo‘shinlarining birinchi, eng mustahkam mudofaa chizig‘ini yorib o‘tganini e’lon qildi.
