Erdo‘g‘on turkiy davlatlar uchun yagona alifbo joriy etishni taklif qildi

Turkiya prezidenti Rajab Toyyib Erdo‘g‘on turkiy davlatlar uchun yagona alifbo yaratishni taklif qildi. Bu haqda Tengrinews xabar berdi.

Erdo‘g‘on Turkiy davlatlar tashkilotining Ostonadagi sammitidagi nutqida tegishli taklifni ilgari surgan.

 “Tilimiz, madaniyatimiz va tariximiz asosida insoniy munosabatlarimizni mustahkamlash uchun oliy ta’lim sohasidagi hamkorlikni mustahkamlash borasidagi sa’y-harakatlarimizni davom ettirmoqdamiz. Albatta, birligimizni mustahkamlashda til juda muhim.

Yagona alifbo ham muhim tarkibiy qism bo‘lib, bunda prezidentlarning qo‘llab-quvvatlashi muhim. Oliy taʼlim kengashi tomonidan tashkilotimiz kotibiyatiga bildirilgan taklif, ishonchim komilki, tashkilotimiz tomonidan ko‘rib chiqiladi”, — dedi Turkiya prezidenti.

Eslatib o‘tamiz, Ostonada Turkiy davlatlar tashkilotining sammiti bo‘lib o‘tdi. Sammitda Ozarbayjon, Qirg‘iziston, Turkiya, O‘zbekiston davlat rahbarlari, shuningdek, kuzatuvchi davlatlar — Vengriya va Turkmaniston rahbarlari ishtirok etdi.