Andijonda katta reyd: 300 ta avtomashina jarima maydoniga olib kirildi
Andijon viloyatida 17—20-noyabr kunlari o‘tkazilgan reyd tadbirida 300 nafar haydovchining avtomashinasi jarima maydoniga tortildi. Bu haqda Majburiy ijro byurosi “Daryo”ga maʼlum qildi.
Aytilishicha, yo‘l harakati qoidalarini buzganlik uchun chiqarilgan qarorlar ijrosini taʼminlash maqsadida MIB Andijon viloyat boshqarmasi hamda Ichi ishlar boshqarmasi jamoat xavfsizligi departamenti YHX xizmati xodimlari hamkorlikda qo‘shma reyd tadbirlari o‘tkazgan.
“Andijon shahrida o‘tkazilgan reyd tadbirida 17—20-noyabr kunlari yo‘l harakati qoidalarini buzganligi uchun qo‘llanilgan jarimalarni to‘lamay kelayotgan 300 nafar haydovchining avtotransport vositasi jarima maydonchasiga joylashtirildi”, — deyiladi MIB axborotida.
Qo‘shimcha qilinishicha, tadbir davomida qarzdorligi mavjud haydovchilardan 1 ming 364 ta qoidabuzarlik uchun 626 million 585 ming so‘m qarzdorlik undirilgan.
