Putin beshinchi muddatga prezidentlikka nomzodini qo‘yishini maʼlum qildi
Vladimir Putin yangi, beshinchi prezidentlik muddati uchun o‘z nomzodini qo‘yishini ma’lum qildi. Bu haqda u Kremlda “Rossiya Qahramonlari”ni taqdirlash marosimidan so‘ng ma’lum qildi.
“RIA Novosti” muxbirining xabar berishicha, bu haqda Putin Ukrainadagi urush ishtirokchisi, o‘zini o‘zi mustaqil deb e’lon qilgan Donetsk Xalq Respublikasi parlamenti spikeri Artem Jogaga ma’lum qilgan.
“Prezident nomzodni ko‘rsatish borasidagi bizning iltimosimizni eshitganidan juda xursandmiz, butun Rossiya uni qo‘llab-quvvatlaydi”, — dedi Joga jurnalistlarga.
U frontdagilarning hammasi Putin saylovda qatnashishi yoki yo‘qligi borasida xavotirda bo‘lgani, shuning uchun bu haqda Rossiya prezidentidan so‘raganini aytdi.
Eslatib o‘tamiz, 7-dekabr kuni Federatsiya kengashi navbatdagi prezidentlik saylovini 2024-yil 17-martga belgiladi. Rossiya Markaziy saylov komissiyasi 2024-yilgi prezident saylovini uch kun davomida: 15—17-mart kunlari o‘tkazish to‘g‘risida qaror qabul qilgan.
