“Quloqlar bilan ishlamaymiz”: Zalujniy kabinetidan eshitish qurilmasi topilganiga munosabat bildirdi

Ukraina Qurolli kuchlari bosh qo‘mondoni Valeriy Zalujniyning kabinetidan eshitish qurilmasi topildi. Zalujniy holat yuzasidan munosabat bildirdi. Bu haqda “RBK-Ukraina” xabar berdi.

“Men sizga shuni aytaman: bu bugun men foydalanishim kerak bo‘lgan xona edi. Kecha tekshiruv chog‘ida u yerdan eshitish qurilmasi topildi”, — dedi Ukraina armiyasi bosh qo‘mondoni.

Ukraina razvedkasiga ko‘ra, kabinetda faqat bitta eshitish qurilmasi aniqlangan. Razvedka ushbu apparat Qurolli kuchlar bosh qo‘mondoni kabinetida emas, balki kelajakda foydalanishi mumkin bo‘lgan xonada topilganini bildirdi.

“Mening bir qancha ishlaydigan joylarim bor va ulardan birida bu sodir bo‘ldi. Uzoq vaqtdan beri u yerda bo‘lmaganman. Lekin tekshirdik va topdik”, — deya qo‘shimcha qildi Zalujniy.

Buni Ukraina Bosh shtabidagi kimdir qilgan bo‘lishi mumkinmi, degan savolga Zalujniy shunday javob berdi: 

“Yo‘q, biz ‘quloqlar’ bilan uzoq vaqtdan beri ishlamaymiz”.

Ukraina Qurolli kuchlari bosh qo‘mondoni mazkur voqeani “urush” deb baholadi.

“Bu xona avval ham ishlatilgan. Ammo tanaffus juda ahamiyatli edi. Shuning uchun bu mening uchrashuvimga ko‘ra tayyorlangan, shekilli”, — dedi Zalujniy.

• Noyabr oyidan beri Ukraina va xorijiy ommaviy axborot vositalari Ukraina prezidenti Vladimir Zelenskiy va Ukraina Qurolli kuchlari Oliy bosh qo‘mondoni Valeriy Zalujniy o‘rtasida ehtimoliy mojaroni muhokama qilmoqda.
• Hammasi Zalujniyning The Economist gazetasiga bergan intervyusidan boshlandi, unda bosh qo‘mondon urush boshi berk ko‘chaga kirib qolgani va bir necha yillar davom etishi mumkinligini aytgandi. O‘z navbatida, Ukraina prezidenti Zalujniyning bahosiga ochiqchasiga qo‘shilmadi va harbiylar siyosat bilan shug‘ullanmasligi kerakligini aytdi. Zelenskiy ofisi mamlakat harbiy va siyosiy rahbariyati o‘rtasidagi bo‘linishni rad etmoqda.