O‘tgan yili mahalla idoralari xodimlariga 6,1 mlrd so‘mlik moddiy yordam pullari to‘lab berildi
O‘zbekistonda 2023-yilda mahalla idoralarining 1733 nafar xodimiga 6 mlrd 107 million so‘mlik moddiy yordam pullari to‘lab berildi. Bu haqda AOKAda o‘tkazilgan brifingda “Mahalla” xayriya jamoat fondi axborot xizmati rahbari Hasan Salomov ma’lum qildi.
Ma’lum qilinishicha, fond tomonidan 15 ming nafarga yaqin fuqaroga 6 milliard so‘mdan ortiq moddiy yordam ko‘rsatilgan.
Shuningdek, 1885 nafar kam taʼminlangan oila farzandlariga 1 milliard 82 million so‘mlik, ijtimoiy himoyaga muhtoj 4 yarim mingga yaqin fuqaroga esa 2 milliard so‘mdan ko‘proq moddiy yordam ajratilgan.
1287 nafar imkoniyati cheklangan fuqarolarga esa qariyb 1,5 milliard so‘mlik nogironlik aravachalari, ortopedik mahsulotlar va eshitish moslamalari olib berilgan.
2023-yilda fond mablag‘lari hisobidan 466 mahalla idorasiga mebel va kompyuter jihozlari olib berilgan va buning uchun 2,5 milliard so‘mdan ko‘proq mablag‘ ajratildi.
