O‘zbekiston yalpi ichki mahsuloti 90 milliard dollardan oshdi
2023-yilda O‘zbekiston yalpi ichki mahsuloti (YIM) ilk bor 1 kvadrillion 66 trillion 569 milliard so‘mni tashkil etdi. Bu haqda Statistika agentligi hisobot berdi.
O‘tgan yilda mamlakat YIM hajmi 6 foiz o‘sib, 90,9 milliard dollarga (o‘rtacha almashuv kursi 11,737 so‘m) yetdi. Bu raqam aholi jon boshiga hisoblaganda 2,5 ming dollardan to‘g‘ri keladi.
Respublika yalpi ichki mahsuloti hajmi 2020-yilda 60,2 milliard dollarni, 2021-yilda 69,6 milliard dollarni, 2022-yilda 81,1 milliard dollarni tashkil etgan.
O‘tgan yilning yanvar – dekabr oylarida mamlakatdagi korxonalar tomonidan 655,8 trillion so‘mlik (2022-yildagidan 6 foiz ko‘p) sanoat mahsulotlari ishlab chiqarildi. Qishloq, o‘rmon va baliqchilik xo‘jaligi mahsulot (xizmat)lari hajmi 426,2 trillion so‘mni (2022-yildagidan 4,1 foiz yuqori) tashkil etdi.
O‘zbekiston yalpi ichki mahsulotining shakllanishida Toshkent shahri 17,1 foiz ulush bilan eng katta hissa qo‘shdi. Toshkent (10,1 foiz) va Navoiy (7,7 foiz) viloyatlari keyingi o‘rinlarni egalladi. Eng kam ulush esa Sirdaryo viloyati (2 foiz), Qoraqalpog‘iston Respublikasi (3,1 foiz) va Jizzax viloyati (3,1 foiz) hissasiga to‘g‘ri keldi.
