“Putinning har qanday buyrug‘ini bajarishga tayyorman, natijasi o‘lim bo‘lsa ham” — Ramzan Qodirov

Checheniston rahbari Ramzan Qodirov “Vagner” rahbari kabi u ham “nishonga olinishi” yoki kasalligi sababli o‘lishi mumkinligi haqidagi xabarlarga munosabat bildirdi. 

 

 

Qodirov shu tariqa uning o‘limini bashorat qilayotgan siyosatshunoslar va xorijiy nashrlarga javob qaytardi.

“Men yana bir bor takrorlashdan charchamayman va g‘urur bilan aytaman: Rossiya oliy bosh qo‘mondoni piyoda askariman va o‘zimga tegishli emasman. Men dinga, vatanga, uning manfaatlariga mansubman. Vladimir Vladimirovichning har qanday buyrug‘ini bajarishga tayyorman, hatto natijasi o‘lim bo‘lsa ham”, — dedi Checheniston rahbari.

Shuningdek, u Putinga hurmat-ehtiromda undan ham fidoyiroq odam borligini bilsa, to‘satdan jon berishini aytdi. Qodirov Rossiya prezidentiga “bir emas, ikki marta jon qarzdor” ekanini va o‘limdan qo‘rqmasligini bildirdi.