Qirg‘iziston qishda elektr isitgichlardan foydalanishni taqiqlamoqchi

Qirg‘iziston Energetika vazirligi qishda elektr isitish tizimidan foydalanishni taqiqlashni rejalashtirmoqda. Bu haqda vazir o‘rinbosari Taalaybek Baygaziyevga tayanib, 24.kg xabar berdi.

Baygaziyev isitish mavsumida aholini elektr toki bilan ta’minlashda uzilish bo‘lmasligini ta’kidladi.

“Suv taqchilligi tufayli elektr isitish tizimini butunlay taqiqlash niyatidamiz. Elektr uzatishda hech qanday o‘chirish bo‘lmaydi. Biz elektrni uzluksiz ta’minlaymiz, shunchaki tejash rejimiga o‘tamiz.

Har bir uy zarur miqdorda elektr energiyasini oladi. Jarayon boshida va oxirida radio, televideniye orqali elektr energiyasini tejash zarurligi haqidagi reklama roliklarini ko‘rsatamiz. Lekin muzlatkich, televizor va elektr pechkalar uchun elektr bo‘ladi”, — dedi Taalaybek Baygaziyev.

Amaldor elektr energiyasi importi masalasi hal qilinayotgani, Qirg‘iziston uni Rossiya va Turkmanistondan sotib olishini qo‘shimcha qildi.