Ramzan Qodirov komada ekani haqidagi mish-mishlar fonida ko‘rinish berdi (video)
Checheniston rahbari Ramzan Qodirov komada ekanligi haqidagi mish-mishlar fonida o‘zi aks etgan videoni kanaliga joylashtirdi.
Qodirov e’lon qilgan videoda chechen tilida gapirgan. U video ostida esa quyidagicha post yozgan:
“Internetda haqiqatni yolg‘ondan ajrata olmagan barchaga toza havoda sayr qilishni va o‘z fikrlarini tartibga solishni qat’iy tavsiya qilaman. Yomg‘ir ajoyib tetiklantiradi”, — deb yozgan u.
Checheniston rahbarining kasalligi haqidagi mish-mishlar
Qodirovning sog‘lig‘i keskin yomonlashgani haqidagi mish-mishlar 2023-yilning bahorida paydo bo‘lgandi. Bunga Checheniston rahbarining o‘zgargan qiyofasi sabab bo‘lgan. Jumladan, u juda ko‘p vazn olgan, yuzlari shishgan va nosog‘lom ko‘rinishga ega bo‘lgan. Shundan so‘ng buyrak bilan bog‘liq muammolar haqidagi versiyalar paydo bo‘lgan. Muammolar zaharlanish natijasida yuzaga kelgani haqida mish-mishlar tarqalgan.
Manbalarning ta’kidlashicha, so‘nggi paytlarda Checheniston rahbari ko‘p vaqtini xorijda o‘tkazib, respublikani boshqarishdan uzoqlashmoqda. O‘z navbatida, Ramzan Qodirov bedavo dardga chalingani haqidagi mish-mishlarni rad etib keladi.
U avvalgidek sport bilan shug‘ullanishi, tog‘larga chiqishi, Chechenistonni rivojlantirishdagi muhim masalalarni muhokama qilish bilan shug‘ullanayotganini ta’kidlagandi. Bundan tashqari, u qo‘lida tibbiy asbob emas, balki elektron tasbeh borligini tushuntirgan.
