Ukraina Qurolli kuchlari Rossiyaning asosiy mudofaa chizig‘ini yorib o‘tdi — WSJ
Ukraina Qurolli kuchlari Rabotino hududida Rossiyaning asosiy mudofaa chizig‘ini yorib o‘tdi. Ayni paytda u yerda shiddatli janglar ketmoqda. Bu haqda Wall Street Journal xabar berdi.
Nashr mualliflariga ko‘ra, Ukraina zirhli texnikasi qarshi hujum paytida birinchi marta Rabotino yaqinida joylashgan Verbovoye qishlog‘i yaqinidagi Rossiya armiyasining asosiy mudofaa chizig‘ini yorib o‘ta olgan. Frontdagi vaziyat haqidagi tegishli ma’lumotlar hududdagi ukrainalik harbiylar bilan o‘tkazilgan intervyularga asoslanadi.
Ukraina armiyasi tankga qarshi to‘siqlarni yengib o‘tishga muvaffaq bo‘lgan, bu ularga zirhli texnikalarni Rossiyaning mudofaa pozitsiyalari orqali olib o‘tish imkonini bergan. Maʼlumotni ukrainalik harbiylardan biri tasdiqlagan.
“Yutuq kichik va bu hudud uchun shiddatli janglar kechmoqda. Ruslar artilleriya bilan hududni tekislab, qarshi hujumga o‘tmoqda. Ukrainaliklar katta yo‘qotishlarga duchor bo‘lmoqda”, — deydi WSJ muxbiri.
Biroq, ukrainalik ofitserlar fikricha, agar Ukraina armiyasi ushbu hududdagi muvaffaqiyatlarini mustahkamlasa, ular ko‘plab og‘ir texnikalarini mudofaa chizig‘i orqali kamroq himoyalangan hududlarga olib o‘tishi mumkin.
Ukrainaning bu uchastkadagi asosiy maqsadi Azov dengiziga yetib borish yoki Qrim yo‘laklarida o‘t ochishni nazoratga olish orqali Dneprning chap qirg‘og‘idagi rus guruhini yo‘q qilishga urinishdir.
“Biz yorib o‘tamiz, ularni yo‘q qilamiz. Ammo buning narxi...”, — deydi anonim ukrainalik harbiy.
Amerika urushni o‘rganish insituti (ISW) tahlilchilariga ko‘ra, Ukraina kuchlari o‘z texnikasini oldinga siljitish uchun hududda Rossiya artilleriyasi va boshqa tankka qarshi tizimlarini yo‘q qilgan bo‘lishi mumkin.
