“Hizbulloh” Rossiyaning kemaga qarshi “Yaxont” raketalari bilan qurollangan — OAV 

Livandagi “Hizbulloh” guruhi P-800 “Yaxont” kemalarga qarshi raketalar bilan qurollangan. Bu haqda “Hizbulloh” arsenalidan xabardor manbalarga tayanib, Reuters xabar berdi.

Xabarga ko‘ra, “Hizbulloh” bu raketalarni Suriyadan urush paytida hukumat kuchlari tomonidan olgan. “Hizbulloh”ning kemalarga hujum qilish qobiliyati jangarilar birinchi marta Isroil dengiz kemasiga hujum qilgan 2006-yildan beri sezilarli darajada oshgan.

Reuters suhbatdoshining so‘zlariga ko‘ra, “Hizbulloh”da “ ‘Yaxont’ va, albatta, boshqa narsalar ham bor”. Guruh hayratlanarli qurol-aslaha, kemalarga qarshi raketalar to‘plaganini AQSH uch nafar amaldagi va bir nafar sobiq rasmiysi tasdiqladi. Ular Pentagon tegishli muammoga jiddiy yondashayotganiga va mintaqada joylashgan Amerika floti raketaga qarshi mudofaaga ega ekaniga ishontirdi.

“Hizbulloh” yetakchisi Sayid Hasan Nasrulloh noyabr oyida O‘rta Yer dengizi sharqiy qismiga kelgan AQSH harbiy kemalarini tilga olgandi. U guruhning ularni nishonga olish uchun vositalari borligi haqida noaniq ogohlantirgan. 

“Sizlar bizni tahdid qilayotgan flotga tayyorlanib qo‘yganmiz”, — degan Nasrulloh.

AQSH O‘rta Yer dengizidagi harbiy-dengiz kuchlari, jumladan, ikkita samolyot tashuvchi va yordamchi kemalari HAMAS, “Hizbulloh” kabi guruhlarni qo‘llab-quvvatlayotgan Eronni o‘z ichiga olgan holda mintaqada mojaro tarqalishining oldini olish uchun joylashtirilganini aytgan.