Shimoliy Koreya ayg‘oqchi sun’iy yo‘ldosh uchirdi. Kim Chen In jarayonni kuzatdi (foto)
Shimoliy Koreya bortida ayg‘oqchi sun’iy yo‘ldoshi bo‘lgan ballistik raketani muvaffaqiyatli uchirganini e’lon qildi. Bu haqda KCNA xabar berdi.
“Maligen-1” sun’iy yo‘ldoshi Sohe kosmodromidan “Chollima-1” raketasi yordamida uchirilgan. Raketa parvozi mahalliy vaqt bilan taxminan 22:43 da amalga oshgan. Raketa berilgan marshrut bo‘ylab normal uchib, 705 soniya o‘tib orbitaga ayg‘oqchi sun’iy yo‘ldoshni qo‘yib yuborgan. Jarayonni kosmodromdan Shimoliy Koreya yetakchisi Kim Chen In kuzatgan.
Janubiy Koreya va Yaponiya rasmiylari sun’iy yo‘ldosh orbitada bo‘lgan yoki yo‘qligini darhol tekshira olmasligini bildirdi. Pentagon matbuot kotibi Sabrina Singxning aytishicha, amerikalik harbiylar uchirilish muvaffaqiyatli bo‘lgan yoki yo‘qligini aniqlashda davom etmoqda.
Janubiy Koreya Shimoliy Koreya bayonotiga javoban harbiy keskinlikni kamaytirishga qaratilgan 2018-yilda imzolangan Koreyalararo kelishuv qismlarini amalga oshirishni to‘xtatish choralarini ko‘rishini bildirdi.
Bu qadam mamlakatlar o‘rtasidagi harbiy chegara chizig‘i atrofidagi hududda razvedka va kuzatuv operatsiyalarini qayta boshlashni o‘z ichiga oladi.
Shimoliy Koreyaning bu yilgi ayg‘oqchi sun’iy yo‘ldoshini orbitaga olib chiqish bo‘yicha birinchi urinishi 31-may kuni bo‘lib o‘tgan va raketa havodan ko‘tarilganidan bir necha daqiqa o‘tib, muvaffaqiyatsizlikka uchragan. Avgust oyi oxirida ham Pxenyanning ayg‘oqchi sun’iy yo‘ldoshni orbitaga olib chiqishga urinishi zoye ketdi. Bu safargi parvozda raketaning uchinchi qismida muammolar yuzaga kelgan, raketaning qismlari Filippindan 600 kilometr sharqda qulagan.
